Haring araw nagpilit
Sinag nya'y pinipilit
Bati ko sayo ulit
Sa ulap sinisingit
Malumanay na ngiti
Ang sumilay sa labi
Nakatanggap ng bati
Mula sayo oyayi
Ulan ang kaulayaw
Sa tubig nagtampisaw
Ulap di magugunaw
Ni silip walang araw
Kahit namamalat
Nagpilit na bumanat
Awit di nagpaawat
Ng haing pasalamat
Ibig ko lang matuwa
Sumaya aking diwa
Nagpasalamat palibhasa
Sa DIOS Amang dakila
Ako ay natutuwa
Sa akin ka'y nahawa
Labis akong namangha
Marunong kang tumula
Ilang ulit kong hihingin
Ang iyong paumanhin
Bago mo iibahin
Ang turing mo sa akin
Ilang beses halimbawa
Ako ay magbabata
Nang hirap at aligata
Para ka lang maawa
Ngayong gabi'y lumalamig
Dulot ng mga halumigmig
Ang tangi lamang kaniig
Harana ng mga kuliglig
Ikaw pala ay umid
Sa igang di pa batid
Bati lang ng matipid
Sating unang pagniniig
Tinitipon ng dilim
Maningning na bituin
Pinang-aakit mandin
Sa mga matang kulimlim
Nagbulwak ng sinag
Araw na maliwanag
Sa papag ay patinag
Nang biyaya'y malaglag
Ilang punyal ibabaon
Sa mga matang Bumabalong
Bago ko iwang malingon
Alaala ng kahapon
Sa lumalalim na gabi
Wag makuhang isantabi
Panalanging nakaimbi
Sa DIOS Amang mabuti
Magandang umaga din
Kahit malayo mandin
Pilit pang aabutin
Ng bati kong may diin
Bati'y sunod sa uso
Tumanggap haba nguso
Gumastos man ng piso
Bati di'y taos sa puso
Ingat po sa paglayas
Pagkat ngayo'y madulas
Baka ka madulas
At bagahe'y manlagas
Makulimlim ang langit
Araw hindi sumilip
Liwanag ikinait
Sa pusong nananabik
Maghapong umuulan
Maghapong araw liban
Maghapong nag-uunahan
Mga damdaming nahibang
Halinghing ng kulisap
Ang syang umaayakap
Sa antok na mailap
Ang hangad ay pangarap
Sumambulat lumigwak
Ang hapdi ay talamak
Lumaganap bumulwak
Sa ulo'y umaantak
Namaluktot sa banig
Ang ulo pa'y humilig
Ang umagang kaylamig
Muling nagkakatinig
Nakakahilong gabi
Ang sa aki'y bumati
Umiikot sumindi
Sa ulo ko'y rumindi
Ngayong gabi'y bumati
Ngunit walang ngumiti
Mensaheng inilapi
Wala man lang bumawi
Tumago ka sa dilim
Matulog kang mahimbing
Sa unan mo ka'y sumiping
Mangarap kang maningning
Tugon ko'y naglikat
Sa tanong mong hinanap
Bakit ako sumulat
Aking tula kamukat
Diyatat 'yong nagawa
Bumanat ng mga tula
Nasanay ba 'yong dila
O may lahi kang makata?
Kung gayo'y wag ipilit
Sa salita mamilipit
Baka 'ko pa masilip
Pag sumabog ang isip
Ganoon nga katoto
Ang turing ko sayo
Di kita niloloko
Kung isip mo'y tuliro
Tunay ngang kakamangha
Gawa ng mga makata
Bulaklaking salita
Taguri nila'y tula
Salamat sa pagtanggap
Salitang inapuhap
Sa malayang hinagap
Ng dati kong pangarap
Kung gayo'y paalam
Sayo 'king kaibigan
Katawan na'y ihimlay
Sa kamang naghihintay
Maghapon ng nagdilim
Liwanag di tumikim
Ang ulan ang lumilim
'Gang ngayong gabi'y tiim
Katanghaliang tapat
Kung ang text ko'y di sapat
Sa ulap ilalapat
Pabati kong may lingap
Huh? Ang aking katoto
Pala ay nasa pulong
Toothpick sanay binugong
Ng mata'y di magsalubong
Tanghaling mainit
Antok nang-aakit
Bago ka pumikit
Text ko muna'y silip
Mga nalikhang tanaga
Puso ko ang gumawa
Di agad nahinuha
Sa buhay ko'y humawa
*TANAGA* isang uri ng tula na may apat na taludtod na magkakatugma na
may tigpipitong pantig sa bawat taludtod.
yang mga tanaga na yan ay mga text at sagot ko sa text sakin ng mga kaibigan ko... yang ganyang uri kasi ng tula ang bagay na bagay sa text messaging eh, maigsi lang at nailalahad na ang ibig mong ipahiwatig sa isang padala lang. maigsi pero malaman. marami pa akong mga mensaheng tula sa celphone ko pero sikreto na yung iba eh. hehehehe..
